ஸ்ரீராமானுஜர் வாழ்கை வரலாறு சித்திர வடிவில்

யாதவப் பிரகாசரை விட்டுப் பிரிந்து, இராமாநுஜர் கச்சி நம்பியுடன் கோவில் பணிகளில் ஈடுபட்டு வருகிறார் என்ற செய்தி ஸ்ரீரங்கத்தில் இருந்த ஆளவந்தாருக்கு கிடைத்தது. வயதும், ஞானமும், பக்தியும் நிறைந்த நிலையில் இருந்த அவர், இந்த செய்தியைக் கேட்டு மிக மகிழ்ந்தார்.

உடனே தம் சீடர்களில் ஒருவரான பெரிய நம்பியை காஞ்சிக்கு அனுப்பி, இராமாநுஜரை உடனே அழைத்து வருமாறு உத்தரவிட்டார்.

பெரிய நம்பி சில நாட்கள் நடந்தும் ஓடியும் காஞ்சிக்கு வந்து, கச்சி நம்பியின் வீட்டில் தங்கி, இராமாநுஜரை சந்திக்கக் காத்திருந்தார்.

அப்போது இராமாநுஜர் சாலைக்கிணற்றுத் தீர்த்தத்தை எடுத்துக் கொண்டு வரதராஜப் பெருமாள் சந்நிதிக்குச் சென்று கொண்டிருந்தார். அவரைக் கண்ட பெரிய நம்பி, ஸ்ரீ ஆளவந்தார் இயற்றிய “ஸ்தோத்திர ரத்னம்” என்ற புகழ்பாடலை உரத்த குரலில் பாடிக்கொண்டே அருகில் வந்தார்.

அந்த பாடலின் இனிமையும், அர்த்த ஆழமும், தத்துவச் சிறப்பும் இராமாநுஜரின் மனதை கவர்ந்தது.
“இத்தனை அழகான துதியை இயற்றிய மகான் யார்?” என்று அவர் கேட்டார்.

அதற்கு பெரிய நம்பி,
“ஸ்ரீவைஷ்ணவ உலகின் உயர்ந்த ஆசார்யரான ஸ்ரீ ஆளவந்தார்தான் இதை அருளியவர்” என்று பதில் கூறினார்.

இதைக் கேட்டதும் இராமாநுஜரின் மனம் மகிழ்ச்சியால் நிறைந்தது.
“அத்தகைய பெரிய ஆசார்யரை உடனே சந்திக்க வேண்டும்” என்று அவர் விரும்பினார்.

அப்போது பெரிய நம்பி,
“ஸ்ரீ ஆளவந்தாரின் ஆணைப்படியே உங்களை அழைத்துச் செல்ல வந்துள்ளேன். உடனே புறப்பட வேண்டும்” என்றார்.

இராமாநுஜர், கோவிலில் தீர்த்தத்தைச் சேர்த்துவிட்டு வர சிறிது நேரம் கேட்டார். அதை முடித்தபின், பெரிய நம்பி கச்சி நம்பியிடம் விடைபெற்று, இராமாநுஜரை அழைத்துக் கொண்டு ஸ்ரீரங்கம் பெரிய கோயிலுக்குப் புறப்பட்டார்.